Odarc - Office du Développement Agricole et Rural de Corse

Prughjetti di a filiera furesta-legnu

A filiera furesta-legnu di Corsica hè à un mumentu maiò di a so esistenza. Hà cunnisciutu tandu, un periudu assai difficiule ma oghje hè in piena ristrutturazione è mudernisazione ghjuvendu di l’abbriu novu di u legnu d’opera in u mercatu liatu à l’utilisazione di materiali biosursati.
Tuttu què necessiteghja : A creazione di sigheria nove (3 prughjetti in corsu è 1 in fasa d’investiscimentu) è prudutti di qualità, certificati è nurmati (adattati à a dumanda) annantu à u mercatu. Ghjè per via d’una vulintà d’accumpagnamentu d’intrapresa, di messa in opera di nove certificazione cum’è LIGNUM CORSICA o CORSICA BOIS BUCHE, è di novi modi di pruduzzione, chè l’ODARC hà prupostu à parechje intraprese d’accumpagnà li à u Salottu Eurobois 2020 urganizatu da u 4 à u 7 di ferraghju in Lyon.
St’intraprese sò :

Ernest EMMANUELLI, sfruttante buscarecciu cù un prughjettu di sigheria,
Scierie Sud-Corse, riprisentata da Eric LUDER, sigheria in prughjettu,
Jean-Charles LECA, sfruttante buscarecciu,
Entreprise Verdier et Compagnie, riprisentata da Jean-Philippe SERRES

È duie altre intraprese anu raghjuntu l’ODARC :

Legnu e Lignamu, riprisentata da Samson SANTONI, sigheria in corsu di creazione
Di Legnu, riprisentata da Pierre-François è Cyrille PELLICCIA, intrapresa di cuncezzione di case in legnu modularie.

U salottu EUROBOIS

U salottu Eurobois spone tutti i dui anni è ghjè una riferenza auropeana di a filiera legnu. Permette di scuntrà prufessiunali di a filiera, da a prima à a siconda trasfurmazione passendu pè l’industria di mobuli, l’arnesi, i materiali legni, a rubutisazione ma dinù i trattamenti è e finizione.

Di pettu à st’uccasione è in u quatru chè ci interessava, avemu pussutu scambià cù fabricanti di sigherie, di siccatoghji, di machine di legnameria, ecc… ma dinù intraprese o associi impegnati in dimarchje di certificazione di i legni.

Intrapresa Colladello, a visita è a cullaburazione

Aldilà di stu salottu, l’ODARC hà dinù urganizatu una visita di l’intrapresa Colladello, fabricante di puntelli in legnu. Stu tipu d’intrapresa ci interessa pè duie raghjone : da i legnu ch’ella trasfurmeghja è da a so altura para di a Corsica.

Ghjè un’intrapresa ch’hà participatu à a realisazione di a corte cuperta d’Evisa in Pinu laricciu è primu bastimentu labellizatu « LIGNUM CORSICA ».

Un spiazzamentu pienu d'uppurtunità

I ritorni annantu à u spiazzamentu sò assai pusitivi : parechji cuntatti sò stati presi cù i prufessiunali prisenti à u Salottu, idee d’investiscimenti è prughjetti anu fiuritu è a visita di l’intrapresa Colladello hè stata assai ricca è struttiva di pettu à e nove vie pensevule in Corsica.